Gedicht des Monats – AugenOhr-Frankfurt

Jeden Monat finden Sie hier ein neues Gedicht von Lutz Riehl, das entweder zur Jahreszeit oder zu einem aktuellen Ereignis passt.

März 2021

Mir mache alles selwer!

 „Mir mache alles selwer“, des is unser Devis,
 denn annere Konzepte sin sämtlisch ferr die Fieß,
 dann TEAM is e Abkürzung ferr: Toll, Ein Andrer Macht’s:
 Mir mache alles selwer! – Merr hält sisch draa, sonst kracht’s.
  
 Mir mache alles selwer; die Arweit die Ideen,
 nor so lässt sich langfristisch es Resultat auch seh’n.
 Merr muss net ständisch bett’le: „Ach däätste, könnste mal?“
 Mir mache alles selwer, dann klappt’s uff jeden Fall.
  
 Mir mache alles selwer, dann schwätzt uns kaaner nei,
 mir sin im Tun un Hannele un aach im Denke frei.
 Mir müsse uns net hetze, dann mir habbe Geduld.
 Mir mache alles selwer, dann sin aach nor mir schuld.
  
 Mir mache alles selwer, des weckt aach manchmal Neid,
 doch kann uns des egal sei, mir habbe unser Freud.
 So kimmt merr gut durschs Lewe, viel besser als mit Hass:
 Mir mache alles selwer, drum mäscht’s aach so en Spass!